《活佛Viva》網民擁戴

【明報專訊】近日網上瘋傳一張印有「佛教流行曲概念大碟」《罪與佛》相片，一個靚仔僧人戴住headphone企喺米高峰前，扮相迷死唔少人。雖然呢隻碟並唔係真實存在，但一眾巴打仍「歌興大發」，當正自己出碟，將多首流行曲改詞翻唱，又加入唔少禪理，其中改編自謝霆鋒《活著Viva》嘅《活佛Viva》更加熱爆全城，YouTube片點擊率已超過8萬人次。


僧人「大碟」 巴打改詞翻唱

網民創意又點止咁少？至噚晚已經爆出多首好歌，例如改編自外國樂隊Eagles經典歌Hotel California嘅Buddha California，另有改自本地組合草蜢《忘情森巴舞》嘅《忘情釋迦舞》，歌詞全部同佛有關，唔少網民喺facebook瘋狂洗版share，唔知呢隻「大碟」最後可以有幾多首歌呢？

「年輕得剃度誰亦能像波惹般乾脆，快活到半日也像活佛一百萬歲！」Emily一邊哼住《活佛Viva》一邊翻查資料，原來「大碟」相片中嘅僧人，係來自內地嘅「釋道心」，喺吉林出世嘅佢，16歲初中畢業後出家，根據佢嘅微博，佢有「佛門小霆鋒」之稱，2008年出過一隻叫做《慈航遠渡》嘅唱片。而前無綫記者柳俊江噚日仲同僧人WhatsApp，問佢有無聽香港網友嘅作品，僧人即話「看見啦謝謝香港朋友」。