3男組落區派政改單張

【明報專訊】政府宣傳政改，官員都要「拋個身」出嚟，噚日中午律政司長袁國強、政制及內地事務局長譚志源同行政會議成員陳智思去到中環皇后像廣場，向市民派發政改單張，同寫有「福」、「和氣生財」嘅揮春，其中，外形唔錯嘅陳智思就令唔少OL主動接過單張喇。


袁國強比較含蓄

譚志源就主攻外籍人士，向來健談嘅佢派單張時都會傾幾句，講吓政改係乜，亦有唔少外國人同佢討論，好似問佢政改係由中央定係港府決定、香港具體點選舉等，譚志源有問必答，又同人解釋「福」字意思，有個外國人喺廣告度見到佢，譚志源笑講對唔住，要對方去到邊都見到佢個樣，認真搞笑。


袁國強就比較含蓄，特別係成班記者圍住佢，影佢點樣派單張，搞到唔少市民唔敢行埋去，司長見形勢唔對路，忍唔住叫記者畀啲空間佢。政制及內地事務局副局長劉江華係議員出身，落街派嘢係老本行，佢就幫手嗌咪，而官員今次派嘅「福」字，原來係出自佢手筆。雖然佢哋派單張氣氛唔錯，但Emily發現，有部分單張出現番喺附近嘅垃圾桶喎。