吳克儉引《出師表》數錯字

【明報專訊】教育局前幾日話喺中學重推文言文範文，噚日教育局長吳克儉見記者，話讀古文最重要係點樣「嗒」文章入面嘅精髓，再喺平時用番出嚟。Emily一聽到，梗係把握機會，考吓局長仲記唔記得自己讀過啲咩啦。不過，吳局長除咗話一時之間記唔起，仲同新聞統籌專員馮煒光一樣咁數錯咗字數。


「不宜妄自菲薄 引喻失義」

話說當Emily問佢記得邊幾句嗰陣，吳局長話突然之間未必講到，又話答晒記者問題先至試吓。之後，佢真係講咗幾句，話比較鍾意《出師表》入面嘅「不宜妄自菲薄，引喻失義」，仲話短短8個字就道出好多人生意義。


有人聽到之後笑咗出嚟，因為成句有10個字，估唔到佢同馮煒光一樣數錯字數。


稱睇出管理人生哲學

吳局長又話，《出師表》入面嘅「親賢臣，遠小人，此先漢所以興隆也；親小人，遠賢臣，此後漢所以傾頹也」，仲話呢兩句可以睇出管理人生哲學咁講。