決心號港啟航 鑽探南海年齡秘密

【明報專訊】女人嘅年齡係秘密，原來南海嘅年齡都係一個謎。美國鑽探船「決心號」噚日喺香港西環啟航，展開為期62日嘅「2013年至2023年新10年大洋鑽探計劃」首個鑽探之旅。上海同濟大學海洋與地球科學學院教授汪品先解釋，科學家對南海年齡爭議很大，落差多達數百萬年，希望今次鑽探取樣可確定南海嘅形成時期同歷史，就好似「將南海呢本書逐頁逐頁翻開」，對石油鑽探、預報海嘯、地震同氣候變化等都有莫大裨益，亦會研究深海底下嘅微生物。


海牀再鑽2000米 歷來最深

科學家首次鑽探南海係1999年，當時用纜索將個鑽放落水深約3000米嘅海牀，再鑽探幾百米，而今次會鑽探3個井口拎樣本，喺水深約4000米嘅海牀再鑽探約2000米，係南海鑽探歷來最深。今次鑽探總成本超過7800萬港元，中國政府支付當中約4700萬，所以艦上嘅31名科學家有13個係中國人，係首個主要由中國科學家領導嘅海洋鑽探計劃。汪品先強調鑽探與南海爭議無關，研究結果同樣本，係任何一個國家嘅研究人員都可以用㗎。香港科大都有份參與項目。