古董名茶佳釀款豪客

【明報專訊】香港銀行幾乎間間都搞私人銀行部門，專幫富豪投資。內地銀行亦開始搞呢種業務。好似招商銀行（3968）咁，已經率先喺富豪集中地東莞，開設當地首間私人銀行，想入呢間東莞「富豪俱樂部」，起碼要有1000萬元（人民幣．下同）嘅投資額。

據《南方都市報》報道，本周三（28日）東莞首家私人銀行——招商銀行私人銀行東莞中心，喺東莞南城區第一國際一棟樓25樓開業。間私人銀行裝修以唐、宋、明、清為主題，各個理財室設有茶茗，可邊品茶邊洽談業務。中心布景擺設最貴嘅一幅蘇繡，價值超過40萬元，仲會針對客戶更換擺放藝術收藏品，高端客戶仲可以喺中心裏面嘅私人小廚品嘗到私房菜。

入場費千萬人仔

與豪華裝修相對應嘅係身價不菲嘅賓客。開業典禮上，隨便撞上一個都係身家千萬嘅富豪，事關入場門檻最低為投資額1000萬元。

點解揀喺東莞開，《廣州日報》引述招商銀行總行副行長丁偉話：「截至6月底，東莞本地外幣存款達到5500多億元，其中私人存款3000多億元，佔所有存款的60%以上，所以這個市場很大。」

招商銀行東莞分行副行長劉玉蘭話﹕「大部分富豪們資產都好多樣化，除了傳統投資股票、理財產品外，招行仲會有藝術品、收藏品、名表等投資渠道提供，讓富豪們增值保值外，進一步與國際接軌提高生活的品質和品味。」

據講，喺金融海嘯後，內地富豪們發現到，必須喺日常對自己嘅財產做好配置，才能控制好風險，應對突發危機。面對此需求，內地各銀行開始加快搞私人銀行部。據講，建行（0939）、農行（1288）也準備喺今年底設立私人銀行。

報料電郵﹕piano@mingpao.com