會計師試升呢

【明報專訊】下星期係最後一屆中五會考放榜，「末代會考生」特別緊張。不過，出路都有好多，各位考生唔駛緊張。而且，香港仲有另一班末代考生陪你哋，佢哋就係會計師。會計師沿用咗11年嘅專業試（qualification programme），今年會「升呢」，加入新嘅內容，包括﹕內地稅制、風險管理。新制考試喺今年12月舉行。

考試有take 2 可以補考

會計專業試分4個單元，每單元有一個考試，呢4個單元合格之後，仲要加一個大考，再加埋工作經驗，先可以攞到專業資格「CPA」牌。有年輕會計師喺報章專欄話，唔夠時間應付考試轉制。會計師公會學生教育及培訓總監伍大成同小琴講，好明白考生嘅心情，要應付一個新安排，需要時間適應。佢哋都特別安排「末代考生」，今年大考唔合格嘅話，有機會take 2，可以補考兩次。不過，把握唔到呢兩個機會，就唯有參與新嘅專業試。佢話專業試「加強版」更能配合市場趨勢，提升會計師嘅專業水平。事實上，愈來愈多內地公司嚟香港上市，會計師角色好重要，投資者都靠佢哋核實各大小行業嘅數據資料。