非物質遺產雞蛋仔無份

【明報專訊】講咗好多年嘅香港非物質文化遺產清單，上年年中諮詢委員會整咗份有多達477項建議嘅清單，首份正式清單噚日終於出爐。Emily睇到最終納入清單嘅有480項，大坑舞火龍、太平清醮、盆菜、詠春拳、港式奶茶等「大路」項目全數入圍，比上次新增3項，分別為「中國（粵語）四字格慣用語」、「手托木偶粵劇（兼製作技藝）」同埋「東江朱家螳螂拳」，又將「旗袍」名稱改成「長衫」；反而為人熟悉嘅雞蛋仔、人力車、霓虹光管，甚至武打巨星李小龍創立嘅截拳道，就統統名落孫山，只係列入「待跟進調查研究項目」。


480項建議清單 盆菜奶茶入圍

文件解釋，因為普查工作小組喺實地考察上述項目時遇到困難，例如搵唔到傳承人訪問，或對方以商業機密為由拒絕透露資料，又可能項目範圍太闊同欠詳細資料等，要等進一步研究先可交畀諮詢委員會考慮。


政府話嚟緊會按呢份清單推行保護措施，包括做保存、宣傳同傳承等工作，今年底仲會籌劃推出一個網上「非物質文化遺產資料庫」，列晒清單項目資料畀市民參閱。有關議題會喺下周二立法會民政事務委員會上討論。