東亞二公子後日英國結婚

【明報專訊】東亞銀行（0023）一向與大笨象匯控（0005），爭先公布業績。今年東亞業績比匯控遲咗一周有多，究竟係咩事比公布業績更重要呢？咪就係後日（8月5日）東亞二公子、現任東亞銀行副行政總裁李民斌大婚之喜囉，其他嘢都要讓路啦！

李民斌大喜嘅日子，會喺英國舉行婚禮。點解會選擇英國？應該係同李公子曾經喺英國讀書（劍橋大學畢業），同埋父親寶哥哥（李國寶），喺英國倫敦出世有關。李氏全家人都同英國好有淵源。遠赴英國完婚嘅另一目的，更加可以逃避香港「狗仔隊」嘅追訪，避免咗親朋好友受到騷擾，盡情分享新人呢個開心嘅日子。

李民斌為城中鑽石王老五，係唔少女士心目中嘅財界經白馬王子。大家會好奇新娘子到底係什麼來頭？原來新娘子係新加坡人，姓馮，親友都叫佢Ling Ling。馮小姐曾經喺德銀工作過，家轉至高盛，任職衍生工具部及定息產品部。兩人相識已有兩年半，相識經過十分傳統，兩人因工作關係而認識。今次男家兄弟陣容雖小，但個個分量十足，除咗大哥李民橋外，也有恒基（0012）二少李家誠，其餘為由細玩到大嘅男性朋友。

9月香港補辦喜酒

不過，李家喺香港朋友眾多，點可以唔請香港親戚朋友飲呢餐喜酒呢？呢對新人揀咗下月喺香港補辦喜酒。當年佢好友李家誠及徐子淇婚禮，就喺四季酒店，李公子今次唔喺四季囉，但亦喺一間五星級酒店。小琴噚日上生活易網站，由風水大師蔡伯勵之女蔡興華編制之2010年結緍吉日。原來8月份係今年最少結婚吉日嘅月份，只有1日及3日係宜嫁娶。不過，9月份就有11日吉日，好啱李公子擺酒。

報料電郵﹕piano@mingpao.com