利信達連走3董事

【明報專訊】製造及銷售皮鞋LeSaunda的利信達（0738），年初至今已有3名執行董事請辭，加上行政總裁劉舜慧放產假，利信達少咗幾位骨幹撐場。不過，董事黃秀嫺話，已經安排好其他同事接替佢哋嘅工作，叫大家放心。佢又話幾位董事仲係好朋友，只不過咁啱得咁蹺，大家都有新發展。

靚女總裁劉舜慧放產假

利信達今年2月公布執董徐愛娟請辭 ，6月又到執行董事、首席財務總監董事黃大聰講拜拜。昨日又再出通告，話執董徐群好做到9月1日就離開。兩位徐女士都係利信達資深員工，54歲嘅徐愛娟加入前後31年，2001年離開，翌年又重返大家庭，專責香港、澳門零售業務。而46歲嘅徐群好喺1981年加入，足足做咗29年，現時仲擔任集團及其附屬公司藝恒信製鞋廠嘅董事總經理，負責原設備製造（OEM）業務及原品牌製造（OBM）業務。

小琴噚日搵到執董黃秀嫺，佢話離職嘅同事都有新發展，大家都替佢哋開心。佢仲話利信達好快有「新成員」，就係靚女行政總裁劉舜慧嘅BB就快出世，Alice已經開始放產假。多咗呢位新成員，唔知利信達會唔會考慮做埋BB鞋嘅市場呢？