飛虎40年 訓練曝光

【明報專訊】噚日有團體搞撐警遊行，另一邊廂，政府新聞處就喺網站上載新聞片同文章，硬銷警隊王牌「飛虎隊」（特別任務連，Special Duties Unit，SDU）點樣勁，除咗講隊員訓練嚴格、屢建奇功，就連「飛虎犬」都有亮相！

一講飛虎隊，唔少人會諗起身穿避彈衣同戴頭套、身材魁梧嘅隊員制服悍匪嘅電影情節，最近市民喺新聞中亦睇到飛虎隊喺啟晴邨樂晴樓游繩到疑兇單位外嘅英姿。原來1974年成立嘅飛虎隊，今年踏入40周年喇，政府噚日就特地發放佢哋平日訓練嘅短片，包括實彈演練。


遴選歷「地獄周」 僅25%過關

飛虎隊以插翼老虎為標誌，每年招募一次，申請人要接受體能、紀律、心理質素等各方面嚴格考驗，歷時11日，有「地獄周」之名，只有約25%應考者能夠通過。通過遴選後，隊員要接受9個月集訓，提升射擊、戰術及體能，訓練包括要求喺100米外擊中拳頭大嘅目標、短時間內攻入槍匪單位營救人質等。


由於遴選極嚴，歷年來只有380多名警員曾喺飛虎隊服役，目前隊員100多人，主要負責處理恐襲、挾持人質同涉及槍械等嚴重罪案。隊員24小時候命，每人基本裝備重達40至50磅，包括MP5輕機槍、Glock 17半自動手槍、防彈背心及頭盔、防毒面罩等。40年來，飛虎隊共參與162次行動，執行水底搜索任務335次。