機局出書懷緬啟德

【明報專訊】赤鱲角機場已經啟用咗16年，不過對唔少港人嚟講，當年啟德機場飛機喺鬧市上空來回飛行嘅情景仍然歷歷在目。唔講唔知，啟德機場係填海而成，至1998年關閉前仍然使用嘅13/31跑道，係喺1958年9月12日啟用，噚日剛好係56周年紀念。


新書耗一年半編著 收錄口述歷史

為回顧本港機場嘅發展史，機管局委託嶺大歷史系副教授劉智鵬團隊，花咗約一年半時間編著《天空下的傳奇——從啟德到赤鱲角》一書，收錄36個受訪者嘅口述歷史，以及唔少市民提供嘅啟德機場圖片，包括日治時期嘅啟德機場高空圖。


送機區停機坪 只隔一道鐵絲網

今年80歲嘅梁妹榮伯伯話，50年代去機場送機，啟德機場嘅送機區同停機坪之間只隔一道幾呎高嘅鐵絲網，同飛機距離好近，佢當年20歲曾經送佢叔叔機，「當年有得坐飛機係一件好威嘅事，前嚟送機嘅人都要著西裝，好隆重其事」。


自細住喺九龍城區嘅吳邦謀話，啟德機場帶畀佢無限回憶，「細細個望住飛機喺頭上飛過，自己又鍾意每事問，例如飛機係咩型號」。