港珊瑚白化10年最慘

【明報專訊】珊瑚白化現象全球日益嚴重，但香港就無乜呢方面研究，今年夏季，生態教育及資源中心聯同綠色力量，喺香港多個潛水熱門地點調查，發現西貢一帶水域都有珊瑚白化，而橋嘴嘅珊瑚白化面積達100平方米，係眾多水域之冠。環團話，今年本港珊瑚白化係過去10年最嚴重，估計與海水水溫持續變暖有關。


中華扁腦珊瑚兩周變白

生態教育及資源中心總監程詩灝話，潛開水嘅人都會感覺到今年夏季嘅海水特別暖，佢調查橋嘴泳灘對出大片珊瑚群落，面積約100平方米嘅中華扁腦珊瑚喺兩星期之內，由正常淺灰色變成白色，佔調查範圍五分之一，都幾誇張，其他地點如牛尾、甕缸、白腊仔，每個地點都有幾十平方米珊瑚白化現象。


綠色力量科學及自然護理總監鄭睦奇表示，本港珊瑚白化成因未明，但翻查天文台紀錄，發現橫瀾島嘅每年平均水溫，由1948年至1962年嘅22.56℃，升至1971至2000年嘅23.02℃，上升0.46℃，唔排除同水溫有關。


鄭又話，珊瑚係各種海洋生物嘅重要棲息地，外國研究顯示，由於各種原因，例如氣候改變、水質污染或人為干擾，令珊瑚內有顏色嘅蟲黃藻離開而出現白化現象，剩番嘅珊瑚骨骼會缺乏營養，慢慢死亡，影響海洋生態，加劇海岸侵蝕。