富士康請人 問70心理題

【明報專訊】富士康內地嘅工廠，早排發生多宗員工自殺事件後，公司增加心理諮詢師駐廠，幫助員工疏導情緒。近期富士康喺鄭州進行大型招聘，都關注員工嘅心理健康，更特別設計咗70條心理問題，要求面試員工作答，睇吓佢哋嘅心理質素，能唔能夠承受工作壓力。

根據《鄭州晚報》報道，上周六朝早8點，省人才市場就出現排隊見工嘅人龍。當日有不同企業招聘，當中以富士康的排場最架勢，佔用最多攤位。不過，富士康今次主要招聘以專業人才為主，包括﹕管理、技術人員、出口加工區項目等，注重應徵者三大能力：語言溝通能力，部分要求英語能力；工作經歷、專業背景。報道話，應徵者要有相關工作經驗，否則唔能夠入圍。

問題環繞工作環境抗壓能力

但今次招聘都關注「心理質素」，富士康設計咗一份心理測驗，有70條問題（見表），環繞工作環境、能否承受壓力等。例如﹕「儘管睡眠不足或者連續工作都毫不在乎」、「即使自己發生了重大的事情，也不會喪失理智」、「常常思考將來的事情並感到不安」。如果應徵者嘅答案脗合句子內容，就記2分；基本符合記1分；不符合或不清楚記0分。報道冇提到幾多分先合格，但由呢啲問題睇到，測試同情緒智商好大關連。負責招聘嘅富士康人員話，應徵者錄用後，會先去深圳培訓，然後再開工。

富士康嘅工廠文化，未必人人頂得住，點解有咁多人應徵呢？有應徵者話，家人住喺鄭州，喺鄭州工作較近屋企，亦有應徵者慕名而來，想見識吓富士康大規模嘅生產同精細分工。就算唔入選，試過面試過程，都可以見識吓富士康嘅效率。今次應徵者過萬人，但富士康喺兩日內就已經完成揀蟀。睇嚟呢批新力軍，都要準備好迎接工作新挑戰喇。

報料電郵﹕piano@mingpao.com