官府介入 路勁孫宏斌言和

【明報專訊】公路大王單偉豹旗下路勁基建（1098）同天津地產狂人孫宏斌，長達四年嘅官司終於告一段落。喺天津市政府介入之下，大家握手言和，噚日更一齊撤銷向對方提出嘅法律訴訟，改為以調解嘅方式解決。

路勁噚日宣布：「公司與孫宏斌的爭議長時間未能解決，引起了天津市政府的關注。」市政府於是由09年開始，積極協助各方調解。

原來，09年8月底，路勁喺市政府嘅協助之下，收回06年向孫宏斌所收購嘅天津順馳公司公章及控制權，並逐步解決公司遺留下嘅問題，而直至今年6月28日，孫宏斌同意以調解嘅方式解決。

對於呢單麻煩嘢，終於得到解決，路勁公司對天津市政府嘅幫忙「耍晒冧」，喺公告中話：「路勁感謝天津市政府在過去18個月對解決爭議所作出的努力及貢獻。董事們認為天津市政府具備最恰當之身分和權威，並會以最公平、公正及務實嘅方法去解決。」

土地控制權爭執 終鬧上法庭

路勁同孫宏斌嘅爭議，要追溯到06年，當時路勁以18億港元，向孫收購陷於財困嘅天津順馳55個項目，近700萬平方米土地儲備，被稱為「中國房地產業有史以來最大收購案」。

當時以為買得平貨，收購之後先知出事，事關公司隱藏咗好多嘅債務，咁都未夠，收購之後路勁並未能順利取得控制權，天津順馳原管理層，拒絕交出代表控制權嘅公章。之後，更一度傳出，喺天津順馳總部，雙方人員出現肢體衝突。上個月，內地《每日經濟新聞》報道，路勁主席單偉豹喺上海出席一個晚宴時承認，收購順馳，路勁係吃咗虧。

之後，大家開始打官司，07年及08年路勁及孫宏斌先後喺香港入稟法院控告對方，路勁控告孫宏斌隱藏公司債務，而孫宏斌就控告路勁不當行使購買權。

報料電郵﹕piano@mingpao.com