瑞房做媒人 羅康瑞心郁郁

【明報專訊】瑞安房地產（0272）除咗喺內地賣樓叻之外，仲做埋「大妗姐」生意，成績唔錯。話說本周一係「中國情人節」七夕，瑞房喺佢哋發展嘅項目重慶天地人工湖上，舉行咗個湖畔派對，撮合年輕男女。大會送出大獎，一年內最早結婚嘅一對情侶，有10萬蚊買屋現金券、贊助蜜月旅遊同婚紗攝影現金券。

瑞房噚日公布業績時，董事總經理李進港好開心咁話，重慶嘅地產項目發展唔錯，本周一喺人工湖舉行嘅派對，成功撮合咗9對男女做「好朋友」。主席羅康瑞話，佢都好想去參加派對見識吓。小琴聽到後，叫羅主席千祈唔好去，啲女參加者一定蜂湧去同羅主席做朋友，男參加者就冇地企。而且羅主席已經有位靚老婆朱玲玲，唔通想扭耳仔？

羅主席笑住話，想去見識吓內地人求姻緣嘅場面。佢話以前嘅年代係盲婚啞嫁，家好唔同，上海父母會幫仔女去搵另一半，重慶呢個活動更家係年輕男女主動嚟尋找伴侶，值得去睇吓。公關大員亦話，配合牛郎織女嘅故事，湖畔整咗條橋，環境好靚。而呢個人工湖亦會喺今年底免費開放畀重慶市民入內。講到咁吸引，睇嚟瑞安都應該考慮吓，喺香港搞吓類似活動，一定大受歡迎。

一年內最早成婚 送10萬買樓

講番重慶嘅活動，有成千幾人報名，揀咗大約400人出席，大會仲特別安排瑞安房地產上海翠湖天地業主相親團、武漢天地租戶老闆相親團嚟參加。當日大會舉辦咗多個集體活動，畀參加者互相認識，仲即場選出最有「夫妻相」嘅情侶。最震撼嘅就係大會安排一項大獎，一年內最早結婚嘅一對情侶，可獲得10萬元購房現金券、愛琴海蜜月旅遊及3500元人民幣金夫人婚紗攝影現金券。

報料電郵﹕piano@mingpao.com