【明報專訊】「路見不平，拔刀相助」，武俠小說家喻戶曉的一句話，現實世界知易行難。徐威僅小一學歷，憑良心出手阻止食環署人員執法，幫助行動不便老小販；可惜良心害苦有心人，「徐老鬼」明言未想過助人會「上身」，搞到「監躉做咗十個鐘頭」，聲言若再遇同類事，會「當睇唔到，搵機關槍指住我都唔做」。
小一學歷 指販管插水
徐威因仗義惹官非，最終全身而退，最初不願多談當日「事迹」，「又唔係紳士名流，只係蟻民，有乜好講」；但被記者包圍下，他亦侃侃而談，承認當天「血氣方剛」，同情心驅使他幫助素不相識的張婆婆，「幫人又唔係為利益，見到個七八十歲阿婆跪喺度，稍為有啲良知都會幫」。
髮絲烏黑，中氣十足，徐威看來不像年屆七旬，「你想見我好易，朝朝七點去清水灣游水」，卻自言是「老樹枯柴」，家住牛頭角上邨，與案發地點數街之隔，當天僅為「路人甲」。他述說當天經過，更手舞足蹈「重演案情」﹕「食環署啲人拉住個七八十歲阿婆，拖人又拖篋。阿婆又揸拐杖又包住腳，係咁話『畀次機會啦，我好慘』。我又唔識佢，只係出於同情心，無諗住自己嘅事，諗住叫阿婆快啲走就算，啲食環就係都要趕絕佢。」
徐威接着指涉案的女助理販管主任「插水」﹕「個女人（事主）拖住個篋上車，我一手拉住佢，同佢講『算啦』，兩三下之後佢就詐跌。在場有幾十個街坊，商戶開門做生意，你唔需要信我，問吓啲街坊。」
平生非首次上法庭，曾因為幫人而被罰款。今回幫人幫到上警局，「做監躉做咗十個鐘頭呀」，徐威事後想起亦自覺「唔多唔少有啲蠢」，雖無後悔但「下回免問」，「要上身嘅。下次當睇唔到，搵機關槍指住我都唔做。民怨就喺咁嚟，（下次）睬佢都嘥氣」。
稱曾錯信同事被騙60萬
「好心着雷劈」並非首次出現在徐威身上，他自言只讀過小一，多年來從事侍應、織造、建築、司機，「喺未抬過棺材」。至今兩袖清風，生活輕鬆，「有老婆仔女就唔會出手啦」，明言自己有義氣，但曾因此成為最失敗的人，「最信任一個舊同事，結果畀佢呃咗60萬棺材本」。
對於食環署被指「擇老而拉」，徐威狠批「絕對係揀人啦」，「十個八個彪形大漢圍住個阿婆，拉一個阿婆，你睇下佢夠唔夠膽拉個畫龍雕鳳（紋身）嘅人吖」。
明報記者 何偉畧
