新聞類別
財經
詳情#
【明報專訊】對於唔少「80後」嚟講，佢哋嘅體育偶像可能係體壇靚女魏聖美、舒拉寶娃、型男費達拿呢一啲世界頂尖運動員，不過作為「90前」嘅小琴，想當年邊度爆出咁多體壇明星，可以揀嘅唔係咁多，當年見到跳馬、吊環、打筋斗樣樣耍家嘅國家體操隊隊員李寧經已暈得一陣陣。小琴絕對無吹水，「體操王子」呢個「朶」咁巴閉，絕對唔係人人受得起！
進軍地產 「希望人人強身健體」
噚日李寧係四季酒店召開記者會，小琴有幸出席，並全程好專心咁聽偶像講解佢嘅鴻圖大計，聽見偶像講解進軍體育環保社區、即係搞地產嘅發展大計，雖然小琴唔係好認同偶像講到，希望人人強身健體，所以要起番啲有體育設施嘅私人屋苑。
奧運做飛將軍 加深舊患?
忽然之間，偶像突然企起身，小琴以為佢畀人話不務正業，發脾氣要拉隊走人之際，佢解釋，原來佢因為腰骨痛要企一企先掂，小琴睇到佢表情都真係堅痛唔係假。其實佢腰痛唔係咩秘密，不過畀小琴親眼睇到歲月催人呢一幕都有啲心酸。
李寧喺北京奧運開幕以飛將軍姿態點火嘅一幕，坊間已有傳聞話這場表現令到佢腰傷加重，全世界幾十億人睇到，加上股價第二日又飈升幾百巴仙，可能令偶像覺得痛都係值得嘅。小琴聽講佢舊年已經喺北京做咗個微創手術，傷患應該醫得七七八八啦喎，唔通近半年真係掛住將快意節能轉型而忽略咗身子？偶像，小心身體喎！
報料電郵﹕piano@mingpao.com
回應 (0)
