劉德華為港運會打氣

【明報專訊】第五屆全港運動會前日開鑼，未來個幾月，全港18區3200幾個運動員會喺各場地展開超過1000場比賽，前晚開幕禮就邀請咗多個歌星同藝員出席，政府新聞網噚日就喺facebook上載咗一向支持運動員嘅歌手劉德華嘅訪問短片，支持全港運動會。


劉德華喺短片中，著住由佢親筆題字寫上「全港運動會」嘅T恤，佢話希望所有運動員都全力以赴，爭取好成績，又話希望香港市民多啲入場，支持吓香港運動員，為佢哋打氣。


民政事務局長曾德成噚日喺網誌話，香港運動員喺國際頂級賽事攞獎，亦會帶動相關運動嘅熱潮，好似單車運動喺香港普及，相信好大程度由黃金寶、李慧詩等取得佳績帶動。調番轉，無廣泛參與同普及體育文化，亦難出類拔萃產生更多精英運動員。


曾德成話港運會係普及運動，唔係所有項目都係比賽，又話未來個幾月市民可以到各場地觀賞比賽，為運動員打氣，同參加延伸活動。