侯志強唔告婆婆「篤面」：唔想糾纏

【明報專訊】上水河上鄉85歲婆婆劉愛嬌，之前被指用手指「篤」傷上水鄉事委員會主席侯志強面部，被警方以涉嫌「普通襲擊」拘捕。不過警方發言人噚日確認，因報案人不追究，婆婆已無條件釋放。


劉婆婆打官司，今個月10號贏咗侯志強，令對方要連同地產代理賠償超過140萬，補償佢農地被倒泥頭嘅損失，不過同一日婆婆同侯志強發生衝突，仲畀人拉咗。侯志強噚日同Emily講，唔想再同婆婆糾纏，仲話「同隻豬嘈有咩好嘈啫」，所以除咗唔追究婆婆「篤」佢，亦唔會就官司上訴，會一次過將啲錢畀婆婆。Emily問佢咁講會唔會有啲過分？但侯志強話唔會理人哋點講。


劉婆婆兒子侯太樂話，婆婆之前被拉「唔開心梗有」，但佢無擔心過婆婆會被定罪，反指侯志強「只係無嘢搵嘢嚟做」。