領14新聞獎 恭喜明報手足

【明報專訊】香港報業公會噚日舉行2014香港最佳新聞獎頒獎禮，《明報》一口氣攞到14個獎，數目係眾報館之最，包括獨家新聞、最佳新人及最佳文化藝術新聞3個冠軍。其中偵查組嘅《權貴離岸公司調查報道》同《地政高官買地爭議》報道奪得最佳獨家新聞冠、亞軍；最佳文化藝術新聞報道組別嘅冠、亞、季軍全部由明報手足包辦。


最佳新人獎由經濟組嘅甄佳佳奪得，佢嘅《中日關係深度報道》及《內房鬼城系列》分別攞到最佳新聞報道同最佳經濟新聞報道嘅優異獎，一人奪3獎。港聞前同事鄭穎瑩嘅《沙中線九龍城地盤，挖出千年宋井系列》同時攞咗最佳文化藝術新聞報道冠軍同最佳新聞報道季軍兩個獎。


攝影同事都有出色表現，例如余俊亮影到佔中發起人戴耀廷喺警方放催淚彈後嘅凌晨，坐喺金鐘嚎哭，奪得新聞組圖片組亞軍。Emily喺度恭喜晒咁多位，而我哋一定會繼續努力，做更多出色嘅報道。