設計外泄惹質疑 得獎咖啡機：唔會延出貨

【明報專訊】攞過香港資訊及通訊科技獎嘅港產科技公司NBition，舊年喺創業網站Kickstarter成功集資84.5萬美金，開發同生產可以用手機應用程式遙距冲咖啡嘅智能咖啡機品牌Arist。不過Arist前日喺Kickstarter上發出通知，話其網站同公司嘅Dropbox戶口被黑客攻擊，當中一啲設計機密文件外泄，惹來一啲集資者（Backers）質疑Arist係咪想借設計外泄，拖延出貨。消息一度喺網上廣傳。


網站集資數百萬創業

Emily問過NBition創辦人趙公允，佢強調唔會延遲出貨，集資時預計嘅出貨日期為6至7月，如果到10月仍未出到貨，承諾會退錢畀Backers。至於喺Kickstarter上發通知只係想「緝兇」，因為佢哋發現黑客單獨行事，盜取嘅文件亦非設計嘅最終版本，估計係惡作劇。至於事件會唔會影響攞專利，趙公允承認最多會遲一個月，「但絕對同出貨進度無關」。