長毛酒會抗議 梁：忍唔住笑

【明報專訊】社民連梁國雄（長毛）同工黨李卓人等幾十人，噚日趁特首梁振英（CY）去會展出席勞工處舉辦嘅勞動節酒會時，走去抗議示威。長毛喺CY準備致辭時，大叫「香港人要普選，梁振英咪走數」，CY唔止無黑面，仲「嘿嘿」笑咗幾聲話「有時係忍唔住笑㗎」，台下有人都跟住笑和應。CY仲諷刺長毛話，政府「係做實事，唔係做騷」。


李卓人駁斥同被趕

長毛喺酒會場內叫口號，最終都被保安趕走，不過就有李卓人接力喺場內示威。李卓人一聽到CY喺度笑，就駁斥佢「你就笑得過，好慘呀，（打工仔）無標準工時」，阿人最後同樣被趕離場。CY話，政府推動經濟發展，促進勞工權益，係做實事、唔係做騷。