文傳讓觀眾變電影老闆

【明報專訊】近期電視及文化投資概念興起，一向搞開公仔書版權授權嘅文化傳信（0343），準備喺本地私募基金安石集團牽頭嘅重慶萬州文化園區，大搞動漫館、微電影城同文傳華夏電影產業私募交易中心，仲揾埋香港電影編劇家協會幾位代表出席。


獲已故大導演李翰祥封為「香港第一影評家」嘅列孚，家身兼文傳執行顧問幫手。佢同文傳董事總經理關健聰話，私募交易中心畀觀眾或外間投資者參與投資電影，佢哋既可以同票房掛鈎分享回報，亦可以預購戲飛形式參與投資，甚至以老闆身分出席首影禮，攞明星簽名，仲可以將所得戲飛招呼員工或嘉賓，過過老闆癮。


文傳執行董事兼首席營運官陳文龍仲話，佢哋嘅私募交易中心，會為擬開戲嘅電影投資，提供一半融資。佢哋亦會用幾千萬投資硬件，畀包括香港在內嘅業界到萬州嘅體育場甚至文化園區內開拍微電影。據講以公司內部資源，已足夠發展佢哋投資幾個電影項目。


[小琴密語 email: piano@mingpao.com]