亞視《報母恩》節目 欣賞指數居首

【明報專訊】香港大學民意研究計劃噚日公布「2014電視節目欣賞指數調查」結果，香港電台第17年蟬聯平均欣賞指數最高嘅電視台，但係令人比較「意外」嘅係，認知率達到5%或以上嘅電視節目入面，獲得最高欣賞指數嘅係亞視節目《滅癌獻愛心報母恩弘大愛祝福大會》，現場宣布嘅時候仲得到觀眾好多掌聲同笑聲；第二、三名分別係無綫嘅《守護生命的故事》同港台長壽節目《鏗鏘集》。


認知率達5%按欣賞指數排名

睇番港大民研嘅研究方法，全年分4個階段做電話訪問，每個階段每個電視台可推舉20個自製節目參加，港大喺各階段分別訪問超過2000人，再選取認知率達5%（即係5%受訪者話睇過節目）或以上嘅節目，按照欣賞指數排名。以此推論，亞視《滅癌獻愛心報母恩弘大愛祝福大會》雖然唔係好多人認識，但只要有超過5%受訪者睇過，又畀好高欣賞指數嘅話，一樣可以拎到冠軍！


10大節目 港台佔8

港大民意研究計劃總監鍾庭耀就話，做民意調查最緊要公平公正，就算個節目名長到15個字，訪問員一樣會清楚讀畀受訪者聽，務求令結果準確。雖然第一名令人有啲意外，不過欣賞指數頭10名節目入面，由第三至第十名都係港台節目，當中仲有3個節目同醫護故事有關，證明觀眾都好關注醫健話題，包括第6、7、9名嘅《醫護人生》、《我的家庭醫生》同《醫生與你》。