股海那麼大 我要去買賣

【明報專訊】「世界那麼大，我要去看看」，內地網民發現這封「豪邁不覊」的非典型辭職信後，這兩句子忽然間爆紅；此壯語，同樣可套用於今天的內地八、九十後股民身上：「股海那麼大，我要去買賣﹗」今年嘅內地「五一」假期，無舊時咁「黃金」喇，得返3日，同港燦一樣，股市亦都同香港同步，只休周五一天，下周一復市。但不少內地後生仔朋友，竟然毫無怨言，事關佢哋寧願有得炒股，都唔嚟香港「鳩嗚」了。


全靠內地官媒推波助瀾，引導股民前仆後繼入市，滬深兩市成交先至可以維持每日成交15,000億嘅歷史水平，成交量足足係美國股市嘅一倍。2007年，趁港股直通車熱潮，香港曾經經歷全民皆股，唔少大學生仲攞埋Grant loan開戶口炒股。


內地最近都出現呢個情况，「一人一戶」放寬之後，開戶人數暴增，滬深兩市開戶人數喺上周第一次突破400萬，差不多係整個3月份嘅總量。內地老友仲話，愈嚟愈多後生仔開戶炒股，在大城市如上海近乎變成一種lifestyle，內地券商嘅生意有幾和味可想而知。


年輕敢死隊 蝕錢好淡定

筆者認識的一名上海八十後朋友，最近都炒得不亦樂乎，好多同輩都炒埋一份，問佢係咪賺得厲害，佢好淡定咁答：「虧得厲害，認識的人沒幾個人賺的，都被忽悠了吧。」這個「了吧」，係一種豪情！而呢種新世代的生活態度，應該會持續一段日子，成為股海敢死敢博嘅生力軍。


鄧普頓基金最近做嘅一項年度調查發現，中國投資者信心出現巨變，內地股民普遍看好股市，認為未來十年都係機遇，逾九成人仲話今年一定可以達到自己定嘅投資目標。


見到最近全民皆股嘅形勢，中證監終於有啲反應，但都只係出口術，喺網站公布十一條金句提醒下小股民，成效有幾大大家心照，只要政策繼續係推動炒股，大形勢不會輕易改變，touchwood到時候有乜冬瓜豆腐，中證監都可以話已經提醒過大家，呢啲做官嘅護身符，國內大小衙門都算係同國際水平睇齊。


得閒起富豪底 不如起綁匪底

大家應該記得剛過去嘅復活節假期後，內地資金帶動令港股猛升，長達近一個月嘅bullish mood，會唔會趁今次假期冷靜一下，抑或會累積多一次購買力，好快就有分曉。不過，今日成個中環最想有分曉嘅，係2800萬綁架案嘅受害富豪係邊個，成班高登巴打幾乎將住係飛鵝山嘅富豪名列晒出來，但無一個啱，據聞有個別三線富豪係咁收電話，畀人問候一番，然後逐一否認。路邊消息話，事主並非好知名，亦不在高登巴打名單上。其實家係咪揾賊緊要啲？不如起吓班賊嘅底好過啦。


[應正亮 廿四味]