主播急口令惹網民挑戰

【明報專訊】TVB高清台財經節目《創富坊》主播林芷彤（Corinne）噚日一段秒速9個字讀出免責聲明嘅片段，快得嚟兼無食螺絲，令佢一夜間紅遍網絡，一班Rapper同網民仲向佢挑戰。TVB企業傳訊部副總監曾醒明笑笑口話，公司一向有留意同事嘅表現同長處，適合嘅話會畀機會佢哋嘗試其他崗位，咁唔知Corinne有無機會拍埋劇？


事緣噚日有網民上載咗一段《創富坊》窩輪片段，Corinne以15秒極速讀出139字結構性產品免責聲明，搞到連專業Rapper MastaMic都錄咗條片挑戰佢。


Emily噚日搵過Corinne，不過佢就好有禮貌咁話唔係好方便傾。曾醒明就話佢未睇過條片，但都有聽聞呢件事。


雷曼爆煲後 輪免責聲明加長

至於呢段股票衍生產品免責聲明，Emily問過香港投資者學會主席譚紹興，佢話其實窩輪發行商一向都要提供，不過以前就好簡單，但自從2008年雷曼爆煲，搞到好多衍生工具投資者損手爛腳，證監會收緊要求，搞到今日聲明「水蛇春咁長」。


譚紹興話，呢啲免責聲明查實係輪商用嚟保護自己嘅手段，證明「我已經講咗啦」，但為咗投資者着想，財經節目主持講得快唔緊要，最緊要係清楚。