撐王國興 吳秋北：講俚語要道歉？

【明報專訊】工聯會立法會議員王國興上星期喺《城市論壇》老羞成怒，向學民思潮發言人黎汶洛講咗一句「收皮啦」，佢強調呢句只係俚語，並無用詞不當。適逢工聯會噚日勞動節舉行五一大遊行，一眾黨友被問到王國興應唔應該向學生道歉，工聯會理事長吳秋北就認同個句只係「俚語」而唔係粗口，希望各界唔好再用嚟攻擊工聯會，仲批評學生雙重標準，「佢哋講晒粗口都無人要佢哋道歉，但我哋講一句俚語就要道歉，呢個咩世界呢？」


黃國健：基層代表講基層語言

另一黨友黃國健都話，一般打工仔都會講「收皮」，即「收檔」咁解，仲話雖然呢句唔係斯文人、上流社會交際場合講嘅語言，但喺一般社交場合就係好普遍嘅說話，無乜人會當係粗口，叫大家毋須緊張。


佢仲話自己同王國興一樣，係「基層工會嘅代表」，代表基層勞工利益，「講番啲基層語言都無咩大問題吖」。