港大自己洗《國殤柱》 支聯歡迎

【明報專訊】香港大學學生會以往每年都會同支聯會一齊清洗《國殤之柱》，但今年唔同，因為港大學生會討論後，唔同意支聯會「建設民主中國」綱領，所以上星期三自己動手清洗。支聯會噚日就發聲明話，歡迎同讚賞港大學生會主動清洗，因為洗柱表達咗青年一代承傳當年學生爭取民主嘅決心，值得支持。


取消洗柱 改加強宣傳悼六四

支聯會話，過去十幾年兩個組織都一齊洗國殤之柱，支聯會今年都問過學生會幹事會，但佢哋話冇呢個計劃，支聯會本身諗住今日自己洗，點知港大學生會喺4月29號（上星期三）自己洗咗。所以支聯會決定今年取消洗柱行動，改為今個月加強宣傳，呼籲多啲人參加「六四」26周年悼念活動。


見到有啲學生組織唔認同「建設民主中國」，支聯會話都感到失望同遺憾，覺得有必要加強同新生代溝通，希望學生組織繼續推動爭取「平反六四」。