高永文動氣 范太評「正常人」

【明報專訊】人稱「民望高」嘅食物及衛生局長高永文前日落區宣傳政改，一度動氣拋下一句「講完」就轉身離去，令政界議論紛紛。民主黨何俊仁就話，高永文連民主黨從政訓練Rule No.1都達唔到；不過全國人大常委范徐麗泰噚日就話相信高永文係性情中人。


范太：高係性情中人

范太話，前日都喺網上睇到高永文嘅表現，認為對方係「性情中人」，不滿被冤枉「呃細路」，所以先要同市民辯論。范太話高永文唔係「我哋一般嘅政客」，高永文只係用正常人嘅反應，但政客係「非常人」。


何俊仁就唔係咁睇。仁哥話，佢平時喺街被人鬧得多，除咗被藍絲鬧佢「賣國」，近年仲多一瓣被鬧「賣港」，但民主黨教落黨員，從政Rule No.1就係唔可以同市民鬧交，因為市民係無權者，議員或官同作為有權力嘅人，應該要聽市民意見，所以，以高永文嘅表現嚟講，連民主黨從政訓練嘅Rule No.1都達唔到。


卿姐廁所被攔無開火

民主黨主席劉慧卿就同Emily講，高永文嘅表現真係好離譜囉，仲話應該叫港大民研快啲做民調，睇吓高永文民望最新走勢喎！卿姐話，佢試過喺一個會所嘅廁所被一個反佔中嘅闊太攔住，聲言要「佔領廁所」。卿姐連離開廁所都被阻，但佢最後都係無同對方開火，只係搵經理求助了事。