現身政改論壇 任亮憲中氣依舊

【明報專訊】已經「退隱江湖」幾年嘅「維園阿哥」任亮憲，噚日現身香港青年時事評論員協會舉辦嘅政改論壇，做番「老本行」，化身「維園阿哥」，兼分飾「維園阿伯」，分別向建制同泛民主派嘅嘉賓「挑機」提問。嘉賓之一、資訊科技界立法會議員莫乃光見到都話「任大哥中氣依舊好夠」。


嘆《城市論壇》近年觀眾噪音多

噚日嘅政改論壇請咗莫乃光、公民黨黨魁梁家傑、人大代表黃友嘉、民主黨黨員黃成智，以及民建聯副主席周浩鼎出席。任亮憲喺台下發言時，都不忘提吓佢嘅發迹地《城市論壇》，佢話《城市論壇》都係一個可以畀左中右人士理性討論嘅地方，奈何近年觀眾席嘅噪音太多，難以理性辯論。


任亮憲繼續發揮「咪霸」本色，一口氣問咗4條問題兼發表意見。但全靠呢個「維園阿哥」，先可以令呢場各自表述、甚少火花嘅政改論壇有啲笑聲。