財爺《復仇者聯盟》扯到政改

【明報專訊】《復仇者聯盟2》上畫，身為漫畫迷嘅財政司長曾俊華噚日喺網誌度話睇咗戲喇，仲講番喺美國讀書時，已經同同學輪流買漫畫交換睇，佢更要節衣縮食去買漫畫，正因為當年落咗唔少苦功睇漫畫，所以喺理解戲中錯綜複雜嘅人物關係無難度，好似佢話Quicksilver同Scarlet Witch兩兄妹喺漫畫中係磁力王（Magneto）嘅仔女，但喺電影版佢哋嘅父母就被Tony Stark公司製造嘅武器所殺呀咁。


講完一大輪輕鬆嘢後，其實財爺都係想借套戲嚟講吓政改嘅。財爺話，每個群體好似電影攝製隊，甚至復仇者聯盟同正義聯盟，成員間都會有唔同意願嘅時候，如果可各取所需，互相尊重就皆大歡喜。


財爺話，支持同反對政改方案嘅各有道理，好難話邊個比邊個正確，亦講唔上邊個較有良知同尊嚴，認為難以、亦毋須說服對方，大家可以agree to disagree。但佢形容堅持否決方案係損人不利己，因為否決方案，想普選市民手上一票會「被消失」，追求真普選嘅，爭取亦無寸進喎。