有人想買《當年今日》 亞視員工力拒

【明報專訊】不獲續牌嘅亞視會唔會執定幾時賣得出一直未有聲氣，亞視新聞部副採訪主任陳國揚話，唔可以一路頂落去，近兩星期再有十幾人諗住走，真係唔知幾時捱到無得播新聞嘅臨界點。無論如何，佢話仲想保住嘅係大量珍藏舊新聞片嘅資料庫，之前有人想買，佢哋都一口拒絕，叫老細唔好，因為呢個係好多代亞視人累積嘅心血，同埋若連舊片都無埋，真係唔知播乜嘢好。


陳國揚唔肯講有邊個想買亞視嘅新聞舊片，但就話早排確係有人打電話嚟問，仲有人想買《當年今日》嘅片。佢哋即同上頭反映，話千祈唔好賣，因為呢個資料庫係好重要嘅資產，萬一清盤時變賣，可能都夠畀遣散費。


亞視經理人、德勤華南區主管合伙人黎嘉恩都話，仲有投資者對亞視有興趣，唔係一個仙都唔值。亞視執董葉家寶原本話4月會出糧，但係到噚日都未兌現。陳國揚話周三員工大會，相信大家會追糧，亦要公司交代下一步去向。