長和國際結緣匯金 恐美麗誤會

【明報專訊】噚日股市其中一個焦點肯定係長和國際（0009），皆因有傳中央匯金入股做大股東，搞到隻股最勁曾經爆升咗成倍。不過，公司噚日傍晚澄清，話大股東鄭強輝只係同匯金做咗個融資安排，有老友同小琴拆解，話成件事可能只係大股東向匯金押股或者做對賭合約，今日開市股價隨時「嘭」一聲跌番落去。


事緣上周五，中央匯金突然申報揸咗長和68.39%股權，搞到有啲人以為匯金真係做咗公司大股東，不過，長和噚晚接近11點先出公告澄清，話鄭生只係做咗份融資安排，即係將所持58.39%股份做擔保向匯金借錢，同時俾咗個10%股份認購期權匯金，不過老友同小琴講，嗰個期權未必咁簡單，可能仲牽涉一啲對賭安排添。


小琴睇番聯交所資料，查實匯金申報持股嘅公司，無一百都有八十間，唔少都係押股呀對賭呀咁，聽講，長和好快就會有公告交代，如果水落石出，睇怕噚日嗰一倍好快會煙消雲散。


email: piano@mingpao.com

[小琴密語]