電車110歲 藝術電車展地道文化

【明報專訊】電車喺香港已經有110年歷史，係本地文化不可或缺嘅一部分。為咗吸引市民乘搭電車同增加坐電車嘅樂趣，近期電車公司又有新搞作，首次同世界知名藝術攝影師K-NARF合作，噚日起將其中一部編號「110」嘅載客電車變身為「藝術電車」，務求令乘客一上車就感受到復古風格。


呢部藝術電車將會掛滿由K-NARF近期走遍香港大街小巷所拍攝嘅相，合共超過100張，主題全部同香港街頭美食同街市有關，透過特製嘅鋁質膠帶裝置喺車廂內，令電車好似「流動照片館」咁行駛。


電車董事總經理魏文話，期望透過K-NARF嘅作品突顯香港嘅地道文化，將昔日記憶同今日面貌互相映照，帶出電車110周年「裝載你我，映照生活」嘅主題。佢透露，電車團隊亦已經構思其他主題嘅藝術裝飾，期望為乘客帶來更多驚喜。呢部藝術電車會行駛至6月底，睇吓市民搵唔搵到佢嘅蹤影，感受一趟「藝術之旅」。