十大政團 雙學出局

【明報專訊】香港十大政團到底花落誰家？香港大學民意研究計劃噚日又派成績表喇。佔領期間紅極一時、上次調查榮登榜首嘅學聯，同當時躋身五強嘅學民思潮，今次就連第一關都過唔到，未能夠躋身十大熟悉政團。另外，經過佔領運動後，幾乎所有政團嘅民望評分都有回升，但全部都唔過50分。


佔領後政團民望大多回升

港大民研今年4月中至5月初分兩階段做十大政團排名調查。要成為十大政團要過兩關，先要成為10個受訪者講得出名嘅政團，喺首關獲最多受訪者講得出名嘅政團分別依次為民建聯、民主黨、自由黨、公民黨同社民連，入圍政團要成功取得50%認知率，先可以進入第二關，讓受訪者評分，再按分數爭排名。


對比起6個月前，9個連續兩度入圍評分階段嘅政團中，6個評分顯著上升，佢哋分別係民建聯、工聯會、職工盟、自由黨、工黨同民主黨。論相對排名﹕


．民建聯今次再位列榜首，係繼2007年11月後首次；

．工聯會位置不變，排名第二；

．民協繼去年2月後再次跨越認知門檻，排名第三；

．職工盟上升兩位，排名第四。


不過，自由黨下跌兩位排名第五；工黨排第六，高過排名跌至第七嘅公民黨。至於民主黨、社民連和人民力量位置不變，繼續排名第八至第十位。