少年警訊Jamie餐廳辦烹飪賽

【明報專訊】少年警訊同英國名廚有乜嘢關係？你估都估唔到，原來少年警訊最近同Jamie Oliver間餐廳Jamie's Italian，合辦咗個健康食譜烹飪比賽，年滿14歲嘅少年警訊會員就可以參加，冠軍除咗可以得到Jamie's Italian 1000蚊餐飲禮券，仲有Jamie親筆簽名食譜，勝出者亦會獲委任做「健康飲食大使」。少年警訊話，比賽係要向青少年宣揚健康生活信息同重要。


其實，今年2月至3月少年警訊同Jamie's Italian已經合辦一連5場「Better Food Better Life」健康飲食工作坊，向青少年提供食物與營養價值知識，除希望幫年輕人建立健康生活，亦希望幫少年警訊會員多啲了解餐飲行業，提供生涯規劃選擇。


冠軍可得1000蚊餐飲券

如果大家想了解多啲，可以去少年警訊facebook「Junior Police Call （PPRB）」，但就算你唔係會員亦唔使失望，因參賽者可以喺交參賽表格時一併交埋會員申請表。