愛狗Ms Mo促漁署停用捕獸器

【明報專訊】關注動物權益嘅公民黨立法會議員毛孟靜，噚日帶埋一個失效嘅捕獸器，聯同多名「動物保護專員」一同召開記者會，要求漁護署帶頭停用捕獸器，並要求港府仿效台灣，設立一個專門保護動物權益嘅「動物保護處」。


組織：報警常被叫打去漁署

「動保專員」鄭錦珊喺會上批評警方，話每次打999向警方報案有人裝設非法捕獸器時，都被要求打去1823搵漁護署，佢認為警方無視有人犯法。記者會上，「動保專員」展示多張狗狗誤踩捕獸器而受傷嘅圖片，有狗狗嘅腳血肉模糊、無咗嚿肉，一向愛狗如命嘅Ms Mo就頂唔順，唔敢直望啲相。


除咗要求漁護署帶頭停用捕獸器，Ms Mo話會喺立法會審議財政預算案時，提出削減漁護署為動物安樂死同捕獵野豬嘅開支，總共係150萬。