戴黃呔被問 中電主席：係金色

【明報專訊】噚日中電主席米高•嘉道理去完股東會出嚟見記者，在場有記者問佢兩條問題，第一條問佢中電澳洲業務有乜嘢計劃，第二條就突然問佢：「你戴住黃色呔，請問你對政改有咩睇法？」

米高•嘉道理聽完即刻笑，第一時間同所有政治立場劃清界線，話戴緊嗰條係金色呔，唔係黃色，仲話條呔係中電40年紀念嘅標記，連消帶打踢走個波，最後笑住補多句：「如果你鍾意，我可以送一條畀你。」全場都畀佢到笑，尤其中電呢類公用事業，長期畀市民同政府夾住，嘉道理一句幽默，就唔怕得失黃藍兩邊。