市民「提名」特首 林鄭居首

【明報專訊】如果有得畀你揀，你最希望邊個成為2017特首候選人呢？政改民意關注組噚日公布嘅民調就畀受訪者自由發揮，講出理想特首候選人人選，結果政務司長林鄭月娥被「提名」嘅次數最多。比較令人意外嘅係，藝人劉德華有被提名，但係提名次數以3票之差輸咗畀社民連梁國雄（長毛），未能躋身十大。


CY第3 葉太阿松同入十大

關注組委託嶺南大學公共管治研究部，喺4月27日至5月2日訪問咗1022人。雖然有得自由發揮提名特首候選人，不過只係得42.2%受訪者肯透露心儀嘅特首候選人人選，有55.8%嘅受訪者話唔知道或者無意見。自稱「建制派」、「泛民主派」嘅人當中，都同樣只得四成幾人願意「提名」，同樣無過半數人願意透露心水特首候選人選。


林鄭躋身十大候選人榜首，特首梁振英（CY）都有被提名，排名第3，低過排第2嘅公民黨主席余若薇。其他入圍十大嘅，仲包括新民黨主席葉劉淑儀（5）、公民黨黨魁梁家傑（6）、香港2020陳方安生（8），以及長毛（亦係8）。