高永文忘落區細節被窒失憶

【明報專訊】食物及衛生局長高永文上周六落區同市民爭論政改時「爆seed」，講完論點後拋下一句「講完」就離去，似乎事件未影響佢落區決心，噚日仲接受民主黨主席劉慧卿主持嘅網台訪問，為事件解畫，但高醫生似乎記性唔多好，憶述當日情况時，被卿姐問到當日去邊區，高醫生答唔出，要政治助理陳凱欣提醒先答到係牛頭角上邨，卿姐就直斥陳凱欣「你唔好提佢啦，家考試呀？」

政助提水 卿姐：考試呀？

高永文話，當日被記者問及與市民爭論時，有記者用咗比較俗嘅字眼形容佢，但佢都唔記得係邊兩個字（編按﹕是「爆seed」），搞到卿姐忍唔住質疑高永文「你失憶呀？」。高醫生解番當日點解咁肉緊，一來佢唔覺得細路仔應該被認為「唔識嘢」，就算有細路話阿媽支持政改所以佢都支持，佢都會叫人自己思考，所以被人話「呃細路」，就有必要澄清喎。


雖然節目上高醫生多次被卿姐搶白，但佢噚日控制情緒非常好，最多只係面露尷尬，無再爆seed，即使早已表明趕時間，但會後仍答咗唔少提問先離開。