Ann姐鬧「廢燉」 阿人唔明

【明報專訊】立法會討論2017年政改方案嘅小組委員會噚日再開會，一如以往，泛民同建制派議員又喺會上有罵戰，民建聯蔣麗芸（Ann姐）形容泛民「廢燉」，佢話，簡單點嚟講，即係「廢物」。


事緣工黨李卓人喺會上批評建制派甘於做奸臣趙高嘅「奴才」，指鹿為馬，跟住政府講2017年嘅選舉制度係一個普選。Ann姐聞言不滿，指李卓人使用冒犯言詞，違反議事規則，仲反問可唔可以指斥泛民係「廢燉」。李卓人立即反擊，「咩係『廢燉』，你發明咗咩字眼？」Ann姐就叫李卓人去查字典。Emily查過 《康熙字典》、《新華字典》，搵唔到「廢燉」一詞，單一個「燉」字就係一種烹調方法。


樹根：促撤8．31未瞓醒

民建聯鍾樹根就另開戰線，話民主派到家仲要求撤回人大常委8．31嘅政改框架，係未瞓醒，「都10點半鐘啦，啲泛民仲未瞓醒，（8•31框架）邊會改變呀」。佢又話泛民阻撓《基本法》23條立法、勾結外國勢力，又唔肯跟民意投票支持政改，「你諗住中央會跪低、中共會好快冧台，你中咗法輪功啲毒呀，唔好中咁多毒啦，清醒啲！」


泛民建制罵戰此起彼落，委員會主席譚耀宗雖然不時敦促大家「唔好互相對話」，但議員都當耳邊風。