逾九成人想同父母旅行

【明報專訊】香港人鍾意去旅行，咁會帶埋父母及長輩去旅行又多唔多呢？旅遊網站Expedia訪問咗300個香港人，發現91%受訪者計劃未來一年同埋父母或長輩去旅行，Emily有唔少朋友過去都會話家庭旅遊報團最簡單，但調查亦見有成76%受訪者會選用自由行方式同長輩去旅行。


調查顯示，同受訪者旅行嘅長輩主要係51歲或以上（86％），接近一半係61歲或以上嘅長者。至於同長輩外遊嘅熱門地點，依次序係台灣（28%）、日本（25%）同新加坡（14%）。


酒店預訂網站Hotels.com上兩個月就透過電郵調查，訪問了超過4900個來自28個地區嘅受訪者，當中包括91個香港人，發現35%嘅香港休閒旅客同53%嘅香港商務旅客話，免費Wi-Fi係預訂酒店嘅第一考慮因素，比免費早餐同風筒更加緊要，睇嚟香港人真係好鍾意上網。