與周庭辯論 周融：畀啲掌聲我

【明報專訊】政改方案料下月表決，無論係支持定反對政改嘅團體，噚日都趁母親節落區宣傳，而學民思潮嘅周庭噚日就喺大圍嘅街站，同保普選嘅大聯盟召集人周融狹路相逢，兩人仲當面討論政改，引嚟唔少人圍觀。


街頭激辯政改白票

生於1950年嘅周融同周庭講，自己喺殖民地年代生活咗「50幾年」，仍然乜都無，所以想要普選，又叫周庭「小朋友」，話呢個係屬於香港人嘅年代，唔係你讀大學就比公公婆婆有更高權利。周庭就反問周融，既然係屬於香港人嘅時代，咁點解香港人唔可以參與特首提名，要中央選完3個特首候選人，先再畀香港人揀呢？


周融無答呢個問題，突然轉去講少數服從多數，係民主真諦。周庭繼續狙擊，問對方如果香港人支持否決政改，反問周融係咪都係轉軚支持否決？周融就話家得27人反對，但支持嘅有43人，但周庭質疑立法會議員唔係全部都係民選，功能組別係小圈子。周融話佢都贊成改遊戲規則，同落實普選特首，咁2020年立法會制度就有機會改變喇。


周庭又質疑，話按政改方案，如果特首選舉就算九成白票，候選人都仲可以當選。周融就反駁，話上年泛民搞電子「公投」揀公民提名建議，都有超過10%白票，係香港史上最多人投白票，但泛民都無取消到。


睇到呢度，唔知讀者覺唔覺得兩人對話有啲答非所問？最終佢哋討論亦無結果，但周融就叫在場人士畀掌聲佢，因為佢作為老人家，都肯同周庭班後生仔討論，值得讚賞佢喎。