觀塘半億起噴泉 立會過一關

【明報專訊】特首梁振英前年宣布為每區預留1億元撥款發展社區項目，唔少區議會已經交咗橋，其中觀塘區議會就建議用5350萬元喺觀塘海濱長廊起一個音樂噴泉，引起唔少討論。噚日立法會民政事務委員會討論各區嘅社區重點項目計劃，結果大部分出席議員都支持觀塘起音樂噴泉，只有民主黨胡志偉一票反對，項目通過之後，要向立法會財委會申請撥款確定。


本身係九龍東直選議員嘅胡志偉喺會上表明唔支持起音樂噴泉，因為個噴泉選址現時喺草地，香港地草地已經唔多，而且海濱公園家都有音樂設施，唔希望用咁多錢換走塊草地，佢仲話其他區議會都係集中諗點樣幫區內弱勢社群。觀塘區議會主席陳振彬就回應話成個海濱長廊有900幾米長，噴泉佔地只係2%，而且起咗噴泉可以令公園更吸引。支持起噴泉嘅經民聯梁美芬就話覺得噴泉可以加強歸屬感。


除咗觀塘嘅音樂噴泉，噚日同時討論其他區議會重點項目，包括油尖旺打算用6350萬元起多元文化活動中心、屯門區用6700萬元活化屯門河及市中心環境，仲有元朗區用1.2億元興建綜合服務大樓，部分開支靠捐款支付。