譚耀宗禁騎呢團體名稱

【明報專訊】立法會近年舉辦比較爭議嘅公聽會，就有唔少「騎呢」組織出現，睇個名就知道對方想嘲諷一下政府，好似以粗口諧音命名嘅「調理農務蘭花系」，相信係始祖之一。今年初政改公聽會亦湧現唔同組織，好似「乜乜乜大聯盟」、「我媽不是慈母大聯盟」等，但主持本周六公聽會嘅有關政改方案小組委員會主席譚耀宗，以「唔夠莊重」為由，唔准數十個團體以團體名義發言。


秘書處促改名或個人身分發言

據網媒《破折號》同《謎米網》報道，多個團體代表噚日收到立法會秘書處電話，指佢哋報名出席本周六嘅政改公聽會，因為團體名稱唔夠莊重，所以要求改名或用個人身分出席，團體包括「國際中指組織」、「人生就係禁悲哀」等。


學民思潮周庭同Emily講，佢以「我明明做過班長但點解上唔到位苦主大聯盟」名稱報名，亦不獲批，佢要求立法會提供書面解釋，講吓團體名稱準則，但對方話提供唔到，佢質疑主席係點判斷。


ban咗數十組織名

譚耀宗就話，坊間有人以不同嘅離奇組織上嚟立會發言嘅情况愈來愈嚴重，過去收到唔少投訴，今次佢就ban咗數十個組織嘅名，但佢哋仍然可以個人身分出席。咁準則係乜嘢？譚sir話一睇啲名就好清楚喇。佢透露議事規則委員會前日開咗會，大家都同意主席有權裁決團體名稱係咪有欠莊重、可以喺會上使用喎。