亞視午間新聞下周取消

【明報專訊】冇得續牌嘅亞視，節目時間表顯示咗最新舉動，下星期一起嘅時間表無咗《12點半新聞》，禮拜一用《時事追擊》代替，之後就用《亞視光輝歲月》代替。亞視發言人話，考慮到新聞部人手，唔排除縮減新聞。


亞視發言人講，就算真係cut咗午間新聞，都無影響個牌，因為牌照係規定喺夜晚6至12點有兩節15分鐘新聞，所以朝早同午間新聞唔係必要嘅。


根據亞視網上節目表，下周一開始無咗《12點半新聞》，連帶跟住播出嘅《經濟快訊》、《天氣報告》亦都取消，但係晚上6點嘅《六點鐘新聞》，同埋晚上11點播出嘅《晚間新聞》就仲喺度。亞視新聞部副採訪主任陳國揚噚晚話無回應。佢之前話過，由11月拖糧起計，新聞部走咗四分之一人手，記者減半剩番10人，再走多幾個人就令採訪更加嚴峻。