「鯉魚門炮台」搞抗戰展

【明報專訊】2015年係二次大戰結束70周年，喺9月3日呢個抗日戰爭勝利70周年紀念日，今年大家仲好可能有假放。民政事務局長曾德成就喺網誌透露，今年有唔少悼念及教育活動，頭炮係搞「戮力同心——粵港抗戰文物展」，展覽會喺本月22於筲箕灣香港海防博物館揭幕，展期至11月。德成局長話，選擇喺海防博物館舉辦，因為原址為前鯉魚門炮台，二戰時經歷激烈戰鬥，留下嘅痕迹至今仍可見。


展覽由香港海防博物館與廣東革命歷史博物館共同籌劃，展品包括抗戰時嘅地圖、書信、宣傳刊物、游擊隊員嘅衣物及用具、日軍軍票、住民證等。局長又講歷史，話1941年12月8日，日軍對香港發動進攻，香港經歷18日後淪陷，佢話老一輩市民都知道「3年零8個月」嘅苦難。


局長話展示目的係以史為鑑，等和平年代長大嘅市民都要警惕軍國主義同埋戰爭禍害。