外交部公署開放日送禮

【明報專訊】位於中區嘅外交部駐香港特派員公署噚日舉行開放日，有逾千名市民排隊入場參觀。公署除咗設展覽，介紹中國外交事務同國家政策，仲準備咗自助餐、紀念品同多種書刊免費派發，好多人又食又拎滿載而歸。現場所見，《習近平談治國理政》一書最受歡迎，未擺上枱已經被搶光；相反香港政府嘅2017政改公眾諮詢報告及方案，就少人問津。


特派員宋哲現身

外交部駐港特派員宋哲噚日短暫現身10分鐘與在場市民拍照同傾偈，佢話希望市民可以藉開放日了解中國嘅外交同國家發展。


現場有唔同嘅展覽介紹中國最新發展，包括一帶一路、一國兩制及外交合作。當中亦有展板特別介紹香港政改方案，強調市民可以「一人一票」選出特首，現場亦有派發政改單張同政改方案書。


展板介紹政改方案

公署亦有安排多項表演，包括民族舞、功夫、中樂同唱歌等，有表演者送上《萬水千山總是情》，台下好多長者聽到拍爛手掌。入場市民仲可以獲紀念品一份，當中包括中國夢環保袋、印上「祖國好，香港好」嘅保溫瓶，仲有修甲套裝、筆記簿，以及《今日中國》小冊子。


民建聯、香港僑界社團聯會都有組團參觀，民建聯立法會議員陳恒鑌就帶同新界青年聯會嘅青年一齊去湊熱鬧，佢話一班後生仔對中國外交都好有興趣。公署仲為青少年安排咗一個講座，教大家「如何做個外交官」。