高永文再為「講完」解畫

【明報專訊】因為一句「講完」由「民望高」變咗「民望跌」嘅食物及衛生局長高永文，出席民建聯蔣麗芸（Ann姐）嘅網上節目時（圖），再為自己嘅真情流露解畫，話同佢舌戰嘅市民根本無聽佢同小朋友嘅對話內容，就指摘佢誤導細路，故當時要澄清。高醫生仲落力展示人性化一面，例如話自己會爭取每個星期日陪爸爸飲茶，休息時會同太太及一班朋友唱K。


閒時鍾意同老婆唱K

高醫生一句「講完」，畀人話佢少落區、唔識同市民接觸。高醫生承認，上次落區後佢個人都收到比較嚴厲嘅批評，但就話自己肯定有心理準備遇到唔同意政改人士。不過，佢承認當時可以大方啲笑笑口應對，或者試吓用溫和語調爭取辯論空間，但係咪真係得，要試過先知。


高醫生噚日亦趁機展露自己人性化嘅一面，話平時休息都會爭取周日中午同阿爸飲茶，閒時同太太及一班朋友唱卡拉OK。高醫生話好享受聽人唱歌，自己唱得唔太好，唱功同前食衛局長周一嶽無得比，仲封埋後門話自己唔會公開表演，睇嚟大家想聽高醫生大展歌喉嘅機會較微喇。