新一哥訪京被酒店門阻住

【明報專訊】新「一哥」警務處長盧偉聰前日出發到北京，展開上任後首次訪京嘅禮節拜訪。噚日喺出發到不同單位會晤前，一哥原來預咗早上8點15分喺大堂跟Emily在內嘅一眾記者講吓行程，一批行家一早排排企等佢，結果等了又等都未見一哥蹤影，原來一哥出門前遇到小阻滯，酒店房門電子鎖突然失靈。


壞鎖催酒店整 職員答「慢慢來」

話說噚日朝著住便服嘅一哥喺酒店食早餐後，諗住返房換衫以展開一日忙碌嘅拜訪行程，點知回房時發現電子鎖失靈，佢用晒兩張匙卡都開唔到鎖，隨行嘅成班阿sir用自己張卡幫一哥試都開唔到門，結果要搵人嚟開鎖。


行程緊密嘅一哥當然唔想遲到，佢班同事不斷催促酒店職員快手整整個鎖，點知內地職員都有佢嘅一套，同佢哋講「不要急，慢慢來」，有行家笑言一哥要認識吓國情。最後成功開到門，還好只係用咗15分鐘。


新一哥上任時話過要加強溝通，多向公眾解釋警隊決策，做到警民一家。Emily同一班隨一哥到北京採訪嘅行家們，都好想可以多跟一哥交流溝通。首日行程暫見一哥都會於出發前同大家交流交流，希望今明兩天有多啲溝通機會，以實際行動證明就好喇。